साविक ऋषिङ्ग रानीपोखरी गाउँ विकास समितिका वडाहरू १,२, ३,४,५,६,७ र ८ लाई समेटेर हालको ८ नम्बर वडा पल्ट्याङ कायम गरिएको छ। राष्ट्रिय जनगणना २०६८ का अनुसार ५०८ घरधुरी रहेको यस वडाको जनसंख्या २,४७५ रहेको छ जसमा पुरुष १,०४९ र महिला १,४२६ रहेका छन्। यस वडामा मगर, ब्राहमण, क्षेत्री, गुरुङ, नेवार, दलित आदि समुदायको बसोबास रहेको छ।
पल्ट्याङमा कोटडाँडा, गढीडाँडा, रानीपोखरी, अजम्बरी कुण्ड, अजम्बरीमाई जस्ता ऐतिहासिक, धार्मिक तथा प्राकृतिक स्थलहरू रहेका छन्। वडाको अजम्बरी स्थित अजम्बरीमाई मन्दिरमा कृष्णाष्टमी र तिज पर्वको अवसरमा ठूलो मेला लाग्ने गर्दछ। अजम्बरीमाई नजिकै रहेको अजम्बरी कुण्डको पानी कहिल्यै घटबढ हुँदैन अर्थात् सधैं एकै सतहमा रहन्छ। गढीडाँडाबाट वरिपरिका नवलपुर, चितवन, पाल्पा, स्याङ्जा, गोरखा, लमजुङ्ग जिल्लाका भू-भागहरू तथा डाँडाकाँडा, सेती नदी र कालीगण्डकी नदीका समथर फाँटको मनोरम दृश्य देखिनुका साथै अन्नपूर्ण, माछापुच्छ्रे, धौलागिरी हिमालको रमणीय दृश्य पनि देख्न सकिन्छ।
वडामा उत्पादन हुने मुख्य कृषि बालीहरूमा धान, मकै, कोदो, मास, अदुवा र तरकारी हुन्। खेतीपाती बाहेक यहाँ सुँगुर/बंगुरपालन, बाख्रापालन र कुखुरापालन पनि गरिन्छ।
पल्ट्याङमा कृषि, पशुपालन तथा पर्यटनको प्रचुर सम्भावना रेहेको देखिन्छ। सामाजिक सम्मान, तालिम, प्राविधिक सेवा, अनुदान, कृषि उपज संकलन, भण्डारण, प्रशोधन र बजारीकरणको व्यवस्था मार्फत कृषि तथा पशुपालनका क्षेत्रमा युवालाई आकर्षित गर्न सकिने सम्भावना छ। त्यसै गरी, पर्यटकीय सेवाको विकासका लागि होमस्टे सञ्चालन गर्न सकेमा पर्यटकहरूको आगमन हुनुको साथै स्थानीय युवाले प्रत्यक्ष रोजगारीका अवसरबाट लाभ लिन सक्नेछन्।