साविक कोटदरबार गाउँ विकास समितिका वडाहरू २,४,५,६ र ७ लाई समेटेर हालको ७ नम्बर वडा कोटदरबार कायम गरिएको छ। राष्ट्रिय जनगणना २०६८ का अनुसार ५६८ घरधुरी रहेको यस वडाको जनसंख्या २,९१२ रहेको छ जसमा पुरुष १,२४८ र महिला १,६६४ रहेका छन्। यस वडामा मगर, ब्राहमण, क्षेत्री, गुरुङ, नेवार, दलित आदि समुदायको बसोबास रहेको छ। 

यस वडामा कोटदरबार, अकलादेवी मन्दिर जस्ता ऐतिहासिक तथा धार्मिक महत्वका स्थलहरू रहेका छन्। नेपाल एकीकरण पूर्व चौबिसे राज्यहरूमा विभाजित रहँदाको समयमा मुकुन्द सेनका भतिजा समसेनले राज्य गरेका कोटदरबारमा दरबारको भग्नावशेष र दरबार क्षेत्रमा रहेका पुराना हातहतियारहरू देख्न सकिन्छ। 

अधिकांश कोटदरबारवासीहरू कृषि तथा पशुपालनमा आश्रित रहेका छन्। यहाँ उत्पादन हुने मुख्य कृषि बालीहरूमा धान, मकै, कोदो, मास, अदुवा, केरा र सुन्तला हुन्। खेतीपाती बाहेक यस वडामा कुखुरापालन, सुँगुर/बंगुरपालन र बाख्रापालन पनि गरिन्छ। वडाको केही महिलाहरू आफ्नै घरमा हाते तान राखेर भांग्रा, कछाड, पछ्यौरी, घलेक आदि जस्ता मगर समुदायले पहिरिने परम्परागत पोसाक बुन्ने गर्दछन्।   

यस वडामा खाद्यन्न बाली, फलफूल खेती, पशुपालन र पर्यटनको प्रवल सम्भावना र अवसरहरू छन्। तालिम र प्राविधिक सहयोग प्रदान गर्न सकेमा उत्पादन वृद्धि सँगै व्यवसायीकरण गर्न सकिने प्रशस्त सम्भावना रहेको छ। वडामा पुरानोथोक, राईथोक जस्ता पुराना बस्तीहरू, ऐतिहासिक तथा धार्मिक महत्वका स्थलहरू रहेका साथै मौलिक कला र संस्कृतिले आन्तरिक तथा बाह्य पर्यटकलाई आकर्षित गर्ने सम्भावना देखिन्छ।