साविक काहुँशिवपुर गाउँ विकास समितिका वडाहरू ४,५,६ र ९ लाई समेटेर हालको २ नम्बर वडा काहुँशिवपुर कायम गरिएको छ। राष्ट्रिय जनगणना २०६८ का अनुसार ६०९ घरधुरी रहेको यस वडाको जनसंख्या ३,०२३ रहेको छ जसमा पुरुष १,२६९ र महिला १,७५४ रहेका छन्। यस वडामा मगर, क्षेत्री, ठकुरी, नेवार, ब्राहमण, गुरुङ, दलित आदि समुदायको बसोबास रहेको छ।

अधिकांश काहुँशिवपुरवासीहरू कृषिमा निर्भर रहेका छन्। यहाँ उत्पादन हुने मुख्य कृषि बालीहरूमा मकै, कोदो, धान र मास हुन्। खेतीपाती बाहेक यहाँ सुँगुर/बंगुरपालन, बाख्रापालन र कुखुरापालन पनि गरिन्छ। यस वडाको ग्वास्लुङ्ग टोलमा महिलाहरूले परालबाट सुकुल, गुन्द्री र चकटी बुन्ने चलन आजपर्यन्त छ।

अधिकांश वडावासीहरू कृषि तथा पशुपालनमा आश्रित रहेकाले यस वडामा खाद्यन्नको साथै तरकारी, सुन्तला, कागती जस्ता नगदे बाली र पशुजन्य उत्पादन वृद्धि गर्न सकिने प्रशस्त सम्भावना रहेको छ। आधुनिक कृषि प्रविधि तथा औजारको प्रयोग गरेर कृषि उत्पादनमा वृद्धि गर्न सकिने भएकाले कृषकहरूलाई व्यवसायिक खेती प्रणाली अपनाउन प्रोत्साहन गर्न सकिनेछ। उत्पादनमा वृद्धि सँगै वडामा तरकारी र कृषि उपज संकलन केन्द्र, चिस्यान केन्द्र, मासुजन्य उद्योग आदि निर्माण गरी रोजगारी सिर्जना गर्न सकिने सम्भावना पनि देखिन्छ। त्यसैगरी, परम्परागत सीप र प्रविधिमा आधारित लघु उद्यम सञ्चालन गरी रोजगारी सिर्जना गर्न सकेमा वडाको आर्थिक विकासमा योगदान पुर्‍याउने प्रशस्त सम्भावना देखिन्छ। परम्परागत सीप र प्रविधिमा आधारित हस्तकलाका उत्पादनहरू सुकुल, गुन्द्री, चकटी लगायतका सामग्रीले प्लास्टिकको प्रयोगलाई बिस्थापन गरी वातावरण संरक्षणमा समेत सघाउ पुग्न जान्छ।