साविक भिरकोट गाउँ विकास समितिका वडाहरू २,३,४,५,६ र ७ लाई समेटेर हालको ४ नम्बर वडा भिरकोट कायम गरिएको छ। राष्ट्रिय जनगणना २०६८ का अनुसार ७३१ घरधुरी रहेको यस वडाको जनसंख्या ३,०१० रहेको छ जसमा पुरुष १,३२२ र महिला १,६८८ रहेका छन्। यस वडामा मगर, क्षेत्री, ठकुरी, बोटे, दलित आदि समुदायको बसोबास रहेको छ।

भिरकोटमा शिव मन्दिर, महादेव मन्दिर, भिमसेन मन्दिर, भिरकोट दरबार जस्ता धार्मिक तथा ऐतिहासिक स्थलहरू छन्।

भिरकोटमा उत्पादन हुने मुख्य कृषि बालीहरूमा मकै, कोदो, मास र तरकारी हुन्। वडाको मुन्लेख र पालुङ्गटार टोलमा काउली, बन्दा, भेडे खुर्सानी, खुर्सानी, टमाटर र अदुवा जस्ता नगदे बाली प्रशस्त उत्पादन हुन्छ। वडाको शिरकोट टोलमा व्यवसायिक बाख्रापालन र सुँगुर/बंगुरपालन गरिन्छ।   

वन यस वडाको प्रमुख प्राकृतिक स्रोत हो। यहाँ साल, कटुस, चिलाउने प्रजातिका वनस्पतिहरू पाइन्छन्।

मकै, कोदो, मास लगायत अन्य बालीहरू र तरकारी खेतीलाई प्राथमिकता दिएर आधुनिक कृषि प्रविधि र तालिम प्रदान गर्न सकेमा यस क्षेत्रको विकासको आधार कृषि बन्न सक्ने देखिन्छ। उन्नत जातको खसी/बोका, सुँगुर/बंगुरपालन गर्न सकेमा प्रशस्त आम्दानी गर्न सक्ने सम्भावना रहेको छ। त्यसै गरी युवालाई काठका फर्निचर, काठका सजावट सामग्री, क्यूरियो सामग्री आदि निर्माण गर्ने तालिम प्रदान गर्न सकेमा वन पैदावारमा आधारित लघु उद्यम संचालनबाट रोजगारीको अवसर सिर्जना हुन सक्ने सम्भावना देखिन्छ।